闻得话妹你死咯，我实在见悲伤。
妹你为因何事，搅到自缢悬梁。
人话你死呢，我尚思疑，我唔信佢讲，今日你果然真系死咗咯，叫我怎不悲伤。
唉唔望与娇弹共唱，唔望灯前月下咯共你结呢段鸾凰。任得天上跌一个落嚟，唔慌我会重想。愁万丈，不若租只小舟将水陆放，等妹你早登仙界直向慈航。
忙解缆，出到江滨。只见江枫渔火照住呢个愁人。各物摆齐兼共果品，我愿妹呀你前来鉴我诚心。
烧页纸钱啲珠泪就恶忍，三杯薄酒奠妹孤魂。烧对童男童女你相亲近。吩咐众人使唤要听佢酌斟。大能(串)锁匙交过你收紧，你两个切莫顽皮激着个主人。
烧到胭脂和水粉，又有刨花兼软枚，重有枧妆一个照妹孤魂。
烧到芽兰带，与共嗰对绣花鞋。可恨当初唔好早日带妹埋街，免使你在青楼多苦捱，咁好沉香都当作烂柴。呢条芽兰带小生亲手买慨，可惜你对花鞋重绣得咁佳。记得八月中秋同把月拜，重话二人衾枕永和谐。点想你别时心事古怪，唉！谁知错意把妹命来嘥。唉！越思越想心痛坏，我啲珠泪流唔晒，妹呀，你梦中魂魄共我讲几句情怀。
烧到被铺蚊帐咯系出在杭州。重有香珠一串十子搭在妹襟头。
烧到烟枪烟托与共个雷州斗，呢我又来烧到嗰个烟屎钩。局纱一盏光明透，妹呀，但凡灯暗你自己添油。你得闲无事拈来啖番佢几口，唉！不妨阴府你自己绸缪。物件咁多烧来交过你手，记紧关防门户咯莫俾人偷。
妹呀，生前你所用慨般般都有，今日把火焚烧在水面浮。我再酌酒，奠妹妆台。我愿妹呀你前来鉴领我一杯。等你饮过此杯呢就离却苦海，早登仙界直上蓬莱。
又到个艇嫂上前同佢抹眼泪，我叫声阿大相(公)呀，你切莫咁悲哀。舍得多情愁冇多情配咩，呢奴奴情愿共你为媒。你既有真心宁守耐，我共你找寻一个重靓过嗰个花魁。人话男子心肠多变改，但我见君情义的确少人陪。睇下蜡烛替君流血泪，半天仙鹤渡郎追，你不如忍泪啦埋街去，免令今夜你自己痴呆。
(快)我忙转艇，快如云。
((白：来啦！)双桨提前水面奔。海阔风狂你需要坐稳啵，等我行埋来共你共你讲番几句时闻。呢我地隔邻有个叫做冯人引，佢真好品啵，脚又细时，满手黹针。年方二八又知书识礼，诗词歌赋样样皆能。旧时有位少爷话要同但上岸啵，佢话要拣个多情人仔至两相登。呢我问声大相呀可否真情允，真正妙甚，真妙甚咯，等我把鹊桥高驾起等你直上浮云。
- 专辑：南音精选
- 歌手：甘明超
- 歌曲：男烧衣
